Институтот за човекови права со длабоко жалење ја прими веста за смртта на поранешниот јавен обвинител Коста Петровски кој беше дел од Управниот одбор на Институтот за човекови права, голем пријател, и значаен борец за владеењето на правото и правдата во нашата земја.

Петровски беше роден на 16.11.1947 година во Скопје. Дипломирал на Правниот факултет во Скопје во 1971 година. Во 1976 година беше избран за заменик јавен обвинител во Општинското јавно обвинителство Скопје, а од 1985 до 1989 година бил заменик во Окружно јавно обвинителство Скопје. Од 1989 година до 26.03.1997 година е основен јавен обвинител на Основното јавно обвинителство Скопје.

Во годините што следуваа Петровски беше избран најпрвин за јавен обвинител во Вишото јавно обвинителство Скопје, а потоа и за обвинител во републичкото Јавно обвинителство.

Во 2008 година беше избран за член на Советот на јавни обвинители од редот на јавните обвинители, а по завршувањето на мандатот се враќа на позицијата во Јавното обвинителство на РМ од каде заминува во пензија.

Коста Петровски е исто така основач на Здружението на јавни обвинители, а во периодот од 2002 до април 2006 година тој е претседател на ова здружение.

Од 2015 година Петровски е дел од Советодавниот одбор, а од 2018 година е член на Управниот одбор на Институтот за човекови права каде неговата улога е од огромно значење.

Претседателката на Институтот за човекови права, членовите на Управниот и Советодавниот одбор, како и членовите на извршната канцеларија на Институтот се благодарни за неговиот придонес и меѓусебното почитување и изразуваат длабоко сочувство до неговото семејство.